Një ngjarje e rëndë ka tronditur qytetin e Gjirokastrës këtë të diel, ku një 17-vjeçar është gjetur i vetëvarur në banesën e tij në fshatin Valare. Viktima është identifikuar si V. Peçi, i cili jetonte me nënën dhe dy motrat, ndërsa babai i tij ndodhej në emigracion.
Sipas të dhënave paraprake, familja Peçi kishte jetuar për një periudhë në Sarandë, ku dyshohet se i riu ishte përballur me bullizëm gjatë ndjekjes së shkollës 9-vjeçare, çka besohet se ka ndikuar në rikthimin e tyre në Gjirokastër. Aktualisht, ai ishte nxënës në gjimnazin “Siri Shapllo”, ku ende nuk është konfirmuar nëse ai ishte subjekt i bullizmit edhe në këtë shkollë.
Të afërm të tij bëjnë me dije se 17-vjeçari kishte shfaqur sjellje të mbyllura dhe gjendje melankolie, por nuk kishte qenë nën ndonjë trajtim mjekësor apo psikologjik. Megjithatë, ai njihej si një nxënës shembullor me rezultate të shkëlqyera në mësime.
Policia ka nisur hetimet për të zbardhur rrethanat e plota të ngjarjes, duke sekuestruar telefonin dhe sende të tjera personale të viktimës. Gjithashtu, pritet të merren në pyetje bashkëmoshatarë dhe persona të afërt me të riun, në përpjekje për të identifikuar shkaqet që çuan në këtë akt ekstrem.
Ky është rasti i dytë tragjik në Gjirokastër pas vetëvrasjes së 17-vjeçares Irsa Muçollari dy muaj më parë, nxënëse në klasën e 10-të C të gjimnazit “Siri Shapllo”.
Lini një koment