Shpërthime të forta krijojnë panik në Sarandë, ndalohen dy të rinj

Dy shpërthime të fuqishme të ndodhura rreth orës 20:55 të mbrëmjes së sotme kanë krijuar panik mes banorëve të qytetit të Sarandës. Menjëherë pas sinjalizimeve, forcat e Policisë kanë ndërhyrë duke nisur hetimet për zbardhjen e rrethanave të ngjarjes.

Pas verifikimeve të bëra, është lokalizuar vendngjarja në zonën e njohur si “Plazhi i Ri”, ku janë kapur në flagrancë dy të rinj që sapo kishin hedhur lëndë piroteknike me fuqi të lartë shpërthyese.

Të ndaluarit janë identifikuar si Ervis Ogici, 18 vjeç, lindur dhe banues në Sarandë, dhe një 17-vjeçar me inicialet K.K., lindur në Kozani dhe banues në Korfuz të Greqisë.

Të dy personat janë shoqëruar në ambientet e Komisariatit të Policisë së Sarandës, ku po kryhen veprimet procedurale për veprën penale “Prishja e rendit dhe qetësisë publike”.

Policia vijon hetimet për të zbuluar nëse pas këtij akti qëndrojnë motive të tjera apo persona të tjerë të përfshirë.