Hetimet vijojnë për të zbardhur rrethanat e plota të vrasjes së turistit portugez Luis Miguel Varela Mendes, ngjarje e ndodhur mëngjesin e 18 gushtit në plazhin e “Principote” në Ksamil.
Sipas mediave të huaja, miqtë e 20-vjeçarit kanë deklaruar se Mendes ndërhyri pasi pa një grua që po shqetësohej nga një grup personash. Sipas dëshmisë së tyre, i riu tentoi të qetësonte situatën dhe të ndalonte ngacmimin, ndërsa në grupin që dyshohet se po shqetësonte gruan ndodhej edhe Sokrat Vata, i dyshuari kryesor për vrasjen.
Nga ana tjetër, Sokrat Vata, i cili punonte si truprojë në “Principote”, ka dhënë një tjetër version për ngjarjen. Ai ka deklaruar se thika fillimisht ka qenë në duart e turistit portugez dhe se ia ka marrë gjatë konfliktit, ndërsa pretendon se u ka kërkuar të rinjve të qetësoheshin, por situata ka agravuar dhe konflikti ka nisur.
Dëshmitë e ndryshme janë pjesë e hetimeve, ndërsa autoritetet po punojnë për të përcaktuar dinamikën e plotë të konfliktit dhe përgjegjësitë për vrasjen e 20-vjeçarit.
Lini një koment