Gjykata e Sarandës ka caktuar masat e sigurisë për 11 personat e arrestuar pas vrasjes së turistit portugez Luis Miguel Varela Mendes në ambientet e “Principote” në Ksamil. Vendimi u dha këtë të premte nga gjyqtari Shkëlzen Liçaj.
Gjashtë persona do të qëndrojnë në burg, ndërsa pesë të tjerë janë lënë të lirë me detyrim paraqitjeje. Në masën “arrest në burg” janë lënë Sokrat Lipan alias Sokrat Vata, Ezgi Parlak, Nuh Mahmutoglu, Ildi Cekani, Ervis Bunçi dhe Serxhi Selimi.
Sokrat Vata, i dyshuar si personi që goditi me thikë për vdekje 20-vjeçarin portugez, u arrestua në Levan të Fierit, ku u gjet i fshehur në bagazhin e një automjeti. Në makinë ndodheshin edhe shtetasja turke Ezgi Parlak dhe Nuh Mahmutoglu, të cilët dyshohet se po e ndihmonin të largohej.
Në burg janë lënë edhe Ildi Cekani, Ervis Bunçi dhe Serxhi Selimi, të tre të identifikuar si kamarierë të “Principote”. Sipas të dhënave të bëra publike për ngjarjen, ata dyshohet se janë përfshirë në konfliktin fizik me turistin përpara se situata të përshkallëzohej.
Ndërkohë, Murat Zhabina, i cili gjithashtu ka qenë kamarier në “Principote”, është lënë i lirë. Gjykata vlerësoi të paligjshëm arrestimin e tij dhe i caktoi masën “detyrim për t’u paraqitur në policinë gjyqësore” të hënën e parë të çdo muaji, nga ora 09:00 deri në 12:00. Zhabina është një nga pesë personat për të cilët gjykata urdhëroi lirimin e menjëhershëm nga paraburgimi.
Në gjendje të lirë, me detyrim paraqitjeje, janë lënë truprojat e kompleksit Luçjano Seferi, Moisid Matushaj, Romeo Shehu dhe Kristi Koshi. Për të pesë këta persona, gjykata ka vendosur të mos vijojë masa e arrestit, duke urdhëruar lirimin e tyre.
Lini një koment