Një kontroll i befasishëm është zhvilluar prej disa orësh në territorin e Bashkisë Sarandë, me fokus kantieret e ndërtimit në qytetin e Sarandës dhe në Ksamil.
Përfaqësues të lartë të AZHT-së dhe IKMT-së, në bashkëpunim me Inspektoratin e Mbrojtjes së Territorit të Bashkisë Sarandë dhe Komisariatin e Policisë Sarandë, kanë ushtruar kontrolle në një sërë kantieresh të pajisura me leje ndërtimi. Gjatë verifikimeve, në disa raste janë konstatuar shkelje apo mangësi në dokumentacion.
Subjekteve u është dorëzuar “Akt-Verifikimi mbi Sigurinë e Kantierit”, dokument i lëshuar nga AZHT dhe IKMT, me një afat 10-ditor për korrigjimin e problematikave të konstatuara. Në rast të mosplotësimit të kërkesave brenda afatit, subjektet rrezikojnë marrjen e masave administrative dhe gjobitjen.
Kontrollet janë shtrirë edhe në disa pika të konsideruara problematike dhe të dyshuara për ndërtime të paligjshme, kryesisht në zonën e Ksamilit.
Pas inspektimeve, Drejtoresha e Përgjithshme e AZHT-së, së bashku me përfaqësues të IKMT-së, drejtues të IMT-së së Bashkisë Sarandë dhe përfaqësues të Komisariatit të Policisë Sarandë, kanë zhvilluar një takim me dyer të mbyllura në ambientet e bashkisë, i cili ka zgjatur rreth një orë e 30 minuta.
Në takim mësohet se ka marrë pjesë edhe Drejtori i Përgjithshëm i AMP-së, Klevis Qose. Sipas të dhënave paraprake, Qose ka mbërritur në Sarandë për të verifikuar punën e strukturave të Policisë së Sarandës, pas disa denoncimeve të depozituara pranë AMP-së, përfshirë edhe pretendime për përfshirjen e punonjësve të policisë në favorizimin e ndërtimeve pa leje.
Kontrollet dhe verifikimet pritet të vijojnë edhe në ditët në vijim, ndërsa pas përfundimit të afatit 10-ditor pritet të përcaktohen edhe masat për subjektet që nuk do të kenë korrigjuar shkeljet e konstatuara.
Lini një koment