Më pak se një muaj përpara zgjedhjeve të përgjithshme të 11 majit, Partia Demokratike ka firmosur një kontratë lobimi në vlerën e 6 milionë dollarëve me një firmë amerikane të lidhur ngushtë me administratën e presidentit amerikan Donald Trump.
Marrëveshja është firmosur më 4 prill nga sekretari i përgjithshëm i PD-së, Flamur Noka, dhe ka si garant në Shtetet e Bashkuara shtetasin Nuredin Seçi. Kontrata me firmën “Continental Strategy” parashikon një angazhim dyvjeçar, me pagesë mujore prej 250,000 dollarësh për shërbime dhe strategji politike.
Në dokumentin e kontratës thuhet se pagesa për tre muajt e parë duhet të bëhet menjëherë pas nënshkrimit. Firma do të angazhohet në krijimin e marrëdhënieve me vendimmarrës në degët ekzekutive dhe legjislative të SHBA-së, me qëllim forcimin e mbështetjes për politikat e PD-së dhe promovimin e reformave qeveritare dhe nismave kundër korrupsionit në përputhje me marrëdhëniet Shqipëri-SHBA.
“Continental Strategy”, e themeluar në vitin 2022 nga ish-ambasadori Carlos Trujillo, është e specializuar në marrëdhënie me qeverinë dhe strategji politike. Trujillo ka shërbyer si ambasador i SHBA në Organizatën e Shteteve Amerikane dhe si këshilltar i fushatës së Donald Trump.
Firma ka lidhje të forta me figura të rëndësishme të Partisë Republikane amerikane. Ndër drejtuesit e saj janë Katie Wiles, vajza e Susie Wiles, Shefe e Stafit të Presidentit Trump pas rizgjedhjes së tij në vitin 2024, si dhe Alberto Martinez, ish-Shef i Stafit i Senatorit Marco Rubio dhe aktualisht Partner Menaxhues i zyrës së Washington D.C.
Kjo është kontrata e dytë e PD-së me faktorë të afërt me Donald Trump, pas mbërritjes së strategut republikan Chris Lacivita në Tiranë. Lëvizja shihet si pjesë e përpjekjeve të Partisë Demokratike për të rritur ndikimin ndërkombëtar në prag të zgjedhjeve.
Lini një koment