Gjykata e Tiranës ka shpallur fajtorë dy personat e akuzuar për ekzekutimin e biznesmenit nga Saranda, Edmond Papa, duke i dënuar me gjithsej 55 vite burg. Vendimi erdhi pas pranimit të plotë të kërkesës së Prokurorisë, e cila kërkoi ndëshkim maksimal për autorët e krimit.
Andreë Bode, i identifikuar si personi që kreu atentatin, u dënua me 30 vite burg për “vrasje me paramendim” kryer në bashkëpunim dhe “mbajtje pa leje të armëve”. Ndërsa bashkëpunëtori i tij, Alban Velo, 30 vjeç, mori 25 vite burg për të njëjtën vepër penale.
Të dy të dënuarit do të vuajnë dënimin në një burg të sigurisë së lartë, për shkak të rrezikshmërisë së veçantë që paraqesin.
Ngjarja e rëndë ndodhi më 16 dhjetor 2022, në rrugën “Fadil Bodinaku” në kryeqytet, kur Papa u qëllua me breshëri plumbash në zonën e Selitës. Autorët u larguan menjëherë nga vendngjarja, ndërsa viktima ndërroi jetë gjatë transportit për në spital.
Edmond Papa rezultonte me precedent penal jashtë vendit, përfshirë një dënim për trafik droge në Greqi dhe skedim në Britaninë e Madhe. Hetimet zbuluan se shkaku i vrasjes ishte një hakmarrje e nisur nga përplasjet në botën e krimit, pas vrasjes së Aleksandër Sadikaj.
Çështja u zbardh brenda disa javësh falë punës së strukturave hetimore dhe pamjeve të sigurisë nga vendngjarja.
Lini një koment