Gjykata e Posaçme e Apelit për Korrupsionin dhe Krimin e Organizuar ka dënuar ish-prokurorin e Sarandës, Sali Hasa, me 2 vite e 4 muaj burg, duke ndryshuar vendimin e mëparshëm të Shkallës së Parë që e kishte lënë në shërbim prove.
Vendimi u shpall këtë të mërkurë, 18 qershor 2025, nga trupa gjykuese e përbërë nga gjyqtarët Engert Pëllumbi, Igerta Hysi dhe Iliriana Olldashi.
Sipas Apelit, Hasa do ta vuajë dënimin në një institucion të sigurisë së zakonshme, pasi për të nuk do të aplikohet më masa lehtësuese që i mundësonte të qëndronte jashtë qelisë.
Ish-prokurori është shpallur fajtor për korrupsion pasiv të funksionarëve të drejtësisë, vepër për të cilën ishte dënuar më herët, por çështja ishte rikthyer për rishqyrtim nga Gjykata e Lartë.
Gjykata vendosi gjithashtu konfiskimin e shumës prej 1,000 eurosh në favor të shtetit shqiptar, ndërsa urdhëroi kthimin e një shume prej 1,070,000 lekësh dhe 1,000 eurosh në favor të të pandehurit. Kostot e procesit gjyqësor në të dy shkallët do të përballohen nga Hasa.
Vendimi nuk është përfundimtar dhe mund të ankimohet në Gjykatën e Lartë brenda 45 ditësh.
Lini një koment