Një plagosje me thikë ka ndodhur mbrëmjen e së hënës në qytetin e Sarandës, ku një konflikt mes dy personave ka degjeneruar në dhunë fizike. Si pasojë, një 47-vjeçar ka mbetur i plagosur dhe është transportuar në spital, ndërsa autori është shpallur në kërkim nga policia.
Sipas njoftimit zyrtar të Policisë së Sarandës, ngjarja ndodhi në lagjen nr. 4 të Sarandës, ku shtetasi D. B., 23 vjeç, dyshohet se goditi me mjet prerës (thikë) shtetasin D. L., 47 vjeç, pas një konflikti për motive ende të paqarta. Fatmirësisht, i plagosuri ndodhet jashtë rrezikut për jetën.
Menjëherë pas ngjarjes, forcat e policisë kanë shkuar në vendngjarje dhe kanë nisur hetimet, ndërsa autori i dyshuar është larguar nga vendi i krimit dhe është shpallur në kërkim.
Grupi hetimor po punon për dokumentimin e plotë të rrethanave të ngjarjes, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë.
Lini një koment