Një shtetase filipineze është arrestuar këtë të hënë nga policia e Sarandës, pasi dyshohet se ka keqtrajtuar një fëmijë të mitur në familjen ku ishte e punësuar si pastruese.
Bëhet fjalë për Lorly Caporal, 46 vjeçe, e cila u arrestua në flagrancë nga Specialistët për Hetimin e Krimeve në Komisariatin e Policisë Sarandë, pas kallëzimit të bërë nga shtetasi A.D.
Sipas denoncimit, gruaja kishte ushtruar keqtrajtim ndaj djalit të tij të mitur gjatë kohës që ndodhej në banesë për kryerjen e detyrave të pastrimit.
“Specialistët për Hetimin e Krimeve në Komisariatin e Policisë Sarandë arrestuan në flagrancë shtetasen filipineze L.C., 46 vjeçe, pas kallëzimit të bërë nga shtetasi A.D. Sipas kallëzimit, kjo shtetase, gjatë kohës që ishte e punësuar si pastruese në banesën e tij, ka keqtrajtuar djalin e tij të mitur.”- bën me dije policia në njoftimin zyrtar.
Materialet për këtë rast i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë për veprime të mëtejshme procedurale.
Lini një koment