Gjykata e Sarandës ka caktuar masën e sigurisë “detyrim paraqitje” për pronarin e “Orange Club”, Spiro Iljadhi, dhe menaxherin e lokalit, Ermal Vata, ndërsa Prokuroria kishte kërkuar “arrest në burg” në mungesë për të dy. Ata dyshohen për veprën penale “Veprime që pengojnë zbulimin e së vërtetës”, në lidhje me ngjarjen e 16 gushtit, ku u dhunua Shefi i Hetimit të Krimit të Komisariatit të Policisë Sarandë, Mateo Bakalli.
Sipas policies, Bakalli ndërhyri për të parandaluar një konflikt mes rojeve të sigurisë së lokalit dhe disa personave, por sipas hetimeve u godit edhe vetë gjatë përplasjes. Për këtë ngjarje, Gjykata e Sarandës ka caktuar më herët “arrest në burg” për gjashtë të arrestuarit: Marjo Katiraj, Elgent Ndoj, Faik Hoxha, Indrit Çullhaj, Ardit Kasemi dhe Besnik Sullollari, ndërsa Pjetër Doçi vijon të jetë në kërkim.
Sipas Prokurorisë, gjashtë të arrestuarit akuzohen për “Goditje për shkak të detyrës”, kryer në bashkëpunim. Në lidhje me ngjarjen janë pezulluar gjithashtu nga detyra dy punonjës policie, të cilët dyshohet se punonin pa leje si roje sigurie në “Orange Club” dhe ndaj tyre ka nisur hetim disiplinor.
Lini një koment