Qyteti i Konispolit është shpallur zyrtarisht Ansambël Arkitektonik Urban me vlera të veçanta historike dhe kulturore, duke i hapur rrugë mbrojtjes, restaurimit dhe promovimit të kësaj qendre me trashëgimi të rrallë.
Vendimi është miratuar nga Këshilli i Ministrave dhe u bë publik nga Ministri i Ekonomisë, Kulturës dhe Inovacionit, Blendi Gonxhja, përmes një postimi në rrjetet sociale.
“Gjatë historisë, Konispoli ka qenë vatër rezistence dhe kulture kombëtare, ndërsa sot ky status i ri përbën një hap të rëndësishëm drejt zhvillimit të qëndrueshëm përmes turizmit kulturor dhe mbrojtjes së trashëgimisë sonë,” u shpreh ministri Gonxhja.
Sipas tij, ky vendim është rezultat i punës së Institutit Kombëtar të Trashëgimisë Kulturore, i cili ka për qëllim garantimin e ruajtjes dhe valorizimit të pasurive të paluajtshme me rëndësi të veçantë për trashëgiminë shqiptare.
Konispoli përfaqëson një identitet unik urban dhe kulturor në jug të Shqipërisë. Banesat tradicionale të qytetit datojnë që nga shekulli XIX dhe XX, ndërsa në strukturën e tij gjenden gjurmë të pazarit të vjetër, arkitekturë karakteristike me gurë të punuar, rrugica me kalldrëm, si dhe lagje me emra fisesh dhe vendbanime antike në zonën e Qafës së Ktismave.
Ky status i ri pritet të ndikojë ndjeshëm në zhvillimin e turizmit kulturor dhe në forcimin e identitetit lokal si pjesë e trashëgimisë kombëtare.
Lini një koment