Shantazhoi dhe i mori para një vajze të mitur, arrestohet 35-vjeçari në Sarandë

Një 35-vjeçar nga Saranda është arrestuar nga policia pasi dyshohet se ka përndjekur dhe shantazhuar një vajzë të mitur për një periudhë rreth njëvjeçare. Ai dyshohet se e ka kërcënuar sistematikisht dhe i ka marrë asaj shuma të konsiderueshme parash.

Rasti është denoncuar nga familjarët e të miturës, të cilët kanë kërkuar ndërhyrjen e organeve të rendit. Pas veprimeve hetimore të kryera nga specialistët për Hetimin e Krimeve të Komisariatit të Policisë Sarandë, është ndaluar shtetasi E. G., 35 vjeç, banues në Sarandë.

Sipas njoftimit zyrtar të policisë: “Bazuar në kallëzimin e familjarëve dhe në provat e siguruara gjatë hetimit, ky shtetas dyshohet se e ka përndjekur të miturën për rreth një vit dhe, duke e kanosur, i ka marrë një shumë të konsiderueshme parash.”

Ndaj të arrestuarit rëndojnë akuzat për veprat penale “Përndjekja” dhe “Shtrëngimi me anë të kanosjes ose dhunës për dhënien e pasurisë”.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë, e cila pritet të marrë në shqyrtim çështjen në vijim.