Skandal në Greqi: 19-vjeçarja shqiptare falsifikoi mesazhet, detyroi babanë të vriste dajën

Larisa, Greqi – Një kthesë dramatike është regjistruar në procesin gjyqësor për vrasjen e 33-vjeçarit Erjon Pelivani, një ngjarje tragjike që tronditi Greqinë dhe Shqipërinë. Fatmir Tarellari, kunati i viktimës, qëlloi për vdekje Erjon Pelivani më 9 janar 2024, duke e ekzekutuar në një zonë të izoluar pranë një fabrike çimentoje, pak jashtë Volosit. Vrasja u krye pas pretendimeve të vajzës së të pandehurit se 33-vjeçari kishte abuzuar seksualisht me të.

Në një seancë të zhvilluar ditën e premte në Gjykatën e Larisës, 19-vjeçarja ka dhënë një dëshmi befasuese, duke pranuar se kishte falsifikuar mesazhe telefonike për të bindur babanë e saj, se daja e kishte shantazhuar dhe abuzuar seksualisht. Kjo dëshmi e re ka sjellë një kthesë të madhe në hetimin e ngjarjes, duke çuar në përmbysjen e hetimeve.

Ngjarja nisi kur Tarellari mori një telefonatë nga pronarja e banesës ku vajza e tij studente jetonte. Ajo e informoi se e bija nuk kishte paguar qiranë, ndonëse ai ia dërgonte paratë në mënyrë të rregullt. Pas kësaj, vajza i shpjegoi se kishte qenë e detyruar t’ia jepte paratë dajës, pasi ai po e shantazhonte me fotografi intime. Për të mbështetur këtë pretendim, ajo i tregoi babait të saj disa mesazhe SMS që ishin të falsifikuara dhe krijonin përshtypjen se 33-vjeçari kishte abuzuar me të.

Duke i besuar plotësisht të bijës, Tarellari vendosi të hakmerrej dhe vrau kunatin e tij, duke përdorur një pushkë gjuetie. Hetimet e mëvonshme të Drejtorisë së Hetimeve Penale të Policisë greke zbuluan se mesazhet ishin të montuara dhe të falsifikuara nga vajza, duke sjellë një përmbysje të plotë të hetimit.

Gjatë seancës, Tarellari u shpreh se ndihej shumë keq për atë që kishte ndodhur dhe për pasojat që kishte shkaktuar.