Vlora është zgjuar mëngjesin e kësaj të diele nga një ngjarje e rëndë kriminale. Rreth orës 06:00, në lagjen “Hajro Çakërri”, pranë hyrjes së banesës së tij, është ekzekutuar me armë zjarri shtetasi Renato Hoxhaj, 58 vjeç.
Sipas informacioneve paraprake, Hoxhaj, i cili punonte si roje objekti në një kantier ndërtimi pranë shtëpisë së tij, është qëlluar me tre plumba teksa kthehej në banesë. Dy prej goditjeve kanë qenë në kokë dhe një tjetër në trup. Ngjarja ka ndodhur në shkallët e hyrjes së banesës së tij, ndërkohë që bashkëjetuesja e viktimës, e cila ndodhej brenda, ka dëgjuar të shtënat dhe ka dalë menjëherë jashtë, ku ka gjetur trupin pa jetë dhe ka njoftuar policinë.
Dyshohet se autorët kanë përfituar nga një rrugë e pasme pa kamera sigurie dhe në kushte të errësirës totale për t’u afruar pranë vendit të krimit dhe për t’u larguar pa u vënë re. Viktima ishte i divorcuar prej vitesh dhe kishte nisur një bashkëjetesë të re. Sipas banorëve të zonës, ai njihej si një njeri i qetë dhe pa konflikte.
Policia ka ngritur një grup të posaçëm hetimor dhe, nën drejtimin e Prokurorisë, po vijon hetimet intensive për zbardhjen e plotë të rrethanave të ngjarjes, sigurimin e provave dhe identifikimin e autorit ose autorëve të dyshuar.
Lini një koment