Kreu i Prokurorisë së Sarandës Klodian Llahos ka reaguar për herë të parë pas vendimit të Këshillit të Lartë të Prokurorisë për ta larguar nga detyra.
Në reagimin e tij ai thekson se vendimi është i pabazuar në ligj dhe i diktuar nga inate personale. Llaho bën përgjegjës Inspektorin e Lartë i Drejtësisë, Artur Metani, për largimin nga detyra dhe e lidh me e lidh me një vizitë të tij në SHBA.
—————————————————————
Reagimi i Klodian Llahos:
E vranë nderin që të jetojë turpi.
Nuk ka tirani më mizore se përjetësimi i drejtësisë nën maskën e ligjit.
Dëshiroj të ndaj një reagim të shkurtër me median.
Me vendimin e sotëm, duke caktuar masë disiplinore ndaj Drejtuesit të Prokurorisë Sarandë, KLP konfirmoi fatkeqësisht anarkinë sociale, anarkinë morale dhe anarkinë ligjore që mbizotëron sot në këtë vend të mjerë.
Për ILD dhe KLP nuk kanë asnjë relevancë sukseset e Prokurorit Kledian Llaho, nga hetimet e të cilit janë sekuestruar në qytetin e Sarandës mbi 40 milionë euro pasuri në favor të shtetit. Për ILD dhe KLP janë gjetur shkelje veprimet e drejtuesit të Prokurorisë vetëm pse ka marrë përsipër hetimin e dy çështjeve penale, të cilat ai i dërgoi në gjyq, por që sipas ILD duhet të trajtoheshin nga ankuesja. Gjithashtu, sipas ILD dhe KLP, Drejtuesi i Prokurorisë nuk e ka dëgjuar, nuk e ka këshilluar dhe nuk e ka “trajtuar” siç duhet prokuroren ankuese B.S.
Vendimi i sotëm është përveç se i pabazuar ligjërisht, por edhe i diktuar nga dëshira e Inspektorit Metani për të performuar në statistika e aspak përmbajtje. Jam proceduar për inate personale dy herë brenda 6 muajve, si asnjë magjistrat tjetër, thua se unë paskam qenë e keqja e sistemit.
Mirëpo është fakt që Inspektori ka qenë pjesë e një delegacioni me mua në SHBA në nëntor 2023 dhe për shkak të qënies time pjesë e atij delegacioni, inspektori nuk mundi ta përtypte dot. Vetëm pas disa muajve shfrytëzoi ankesat pa asnjë rëndësi dhe nisi procedim disiplinor ndaj meje për vonesë në një çështje pa asnjë interes, ndërkohë që sistemi lëngon prej ngarkesës ekstreme. Inspektori pas dy muajve nga nisja e procedimit të parë nisi një tjetër procedim mbi ankimin e një prokuroreje me të cilën kanë punuar ndihmës inspektorja e çështjes ndaj meje, por edhe ai vetë në Avokaturën e Shtetit. (Konflikt i pastër interesi).
Unë do ta ankimoj këtë proces dhe ankimimet nuk do të bëhen në ambientet e 15-katëshit (inspektori e di vetë pse jo atje), por zyrtarisht me postë! Shumica ka frikë prej të aftëve sepse nuk dëshiron rodhe nëpër këmbë.
Dhe po e mbyll me fjalët e Dritëroit të madh:
Botë e mallkuar, plot me rezilë,
I miri shpon shpon duar,
I ligu fiton trendafilë.
Drejtuesi i Prokurorisë Sarandë, Kledian Llaho.
—————————————————–
Me vendimin e marrë këtë të enjte nga KLP, Llaho nuk do të jetë më drejtues i organit të akuzës në Sarandë, por as prokuror.
Këshilli i Lartë i Prokurorisë vendosi gjithashtu pranimin pjesërisht të kërkesës së Inspektorit të Lartë të Drejtësisë për procedim disiplinor ndaj magjistratit të Sarandës, duke i ulur pagën me 20%, përkundër masës 40% që kishte kërkuar ILD.
Hetimi disiplinor i ILD ka konstatuar se Llaho ka shkelur disa rregulla dhe ka abuzuar me detyrën e tij. Sipas KLP, ai ka dështuar të përmbushë detyrimet ligjore në menaxhimin e çështjeve dhe ka shkelur rregullat e sjelljes profesionale ndaj kolegëve të tij. Sipas ILD, veprimet e Llaho rrezikojnë të dëmtojnë imazhin e Prokurorisë dhe të përkeqësojnë funksionimin e saj.
Inspektori i Lartë i Drejtësisë nisi hetimin disiplinor ndaj magjistratit, bazuar në 6 ankesa të një prokuroreje po në Prokurorinë e Sarandës, për veprime e sjellje që përbëjnë shkelje disiplinore nga ana e drejtuesit.
Llaho nuk mund të ushtrojë as detyrën e prokurorit pasi rezulton i pezulluar nga detyra me vendim të Gjykatës së Posaçme. Pezullimi ka ardhur pas kërkesës së SPAK, që po e heton prokurorin nën dyshimet për korrupsion, për përfitime të parregullta që ka marrë përmes vjehrrit të tij
Lini një koment