Komisioni Qendror i Zgjedhjeve ka pranuar një ankesë të Partisë Demokratike, duke urdhëruar largimin e materialeve zgjedhore të vendosura nga Partia Socialiste në zyrën e saj elektorale pranë KZAZ nr. 89 në Delvinë. Vendimi u bë publik nga deputetja e PD-së, Ina Zhupa, e cila theksoi se zyrat elektorale nuk lejohen të jenë më afër se 300 metra nga Komisioni Zonal i Administrimit të Zgjedhjeve.
Me këtë vendim zyra në qendër të qytetit të Delvinës, e kandidatëve Ardit Bido dhe Ina Majko, duhet të mbyllet dhe të zhvendoset më larg KZAZ-së.
“Zyra elektorale e Partisë Socialiste në Delvinë duhet të heqë të gjitha materialet zgjedhore, sepse shkel ligjin. Kandidati i PS na tha se do dilnim bllof, por ja që si gjithmonë kemi pasur të drejtë,” deklaroi Zhupa, gjatë një daljeje publike së bashku me kryetarin e PD-së në Delvinë, Erigers Hamiti.
Ajo gjithashtu sqaroi se selitë apo zyrat qendrore të partive nuk preken nga ky vendim, duke iu përgjigjur drejtpërdrejt deklaratave të përfaqësuesit të PS, Ardit Bido.
“Delvinjotët, apo siç i quajti kandidati i PS-së – trojanët, më 11 maj do të zgjedhin Partinë Demokratike dhe Aleancën për Shqipërinë Madhështore,” përfundoi Zhupa.
Lini një koment