Një ngjarje e rëndë është regjistruar këtë të martë në zonën e Ali Demit në Tiranë, ku zyra elektorale e Partisë Socialdemokrate, e drejtuar nga Tom Doshi, është sulmuar nga persona ende të paidentifikuar.
Sipas informacioneve paraprake, disa individë kanë thyer xhamat e zyrës dhe janë larguar nga vendi i ngjarjes me një automjet, ndërkohë që forca të shumta policie dhe grupi hetimor kanë rrethuar zonën.
Gjatë këqyrjes së vendit të ngjarjes, janë gjetur dy fishekë luftarakë të paplasur, çka ngre dyshime të forta se bëhet fjalë për një incident të planifikuar. Motivet e incidentit mbeten ende të paqarta.
Në njoftimin zyrtar të Policisë së Tiranës thuhet se rreth orës 14:00 është marrë një telefonatë për një konflikt në ambientet e një zyre elektorale në rrugën “Ali Demi”. Policia bën me dije se gjatë kontrollit, përveç dëmtimeve materiale, janë gjetur edhe fishekët e paplasur.
Gjithashtu, po analizohen pamjet e kamerave të sigurisë në zonë, në përpjekje për të hedhur dritë mbi këtë akt.
Policia, nën drejtimin e Prokurorisë, vijon hetimet për zbardhjen e plotë të motivit dhe rrethanave të ngjarjes së rëndë në kulmin e fushatës elektorale.
Lini një koment