Policia Kufitare e Sarandës ka finalizuar operacionin e koduar “Transit 3”, duke goditur një rast të transportimit të paligjshëm të emigrantëve drejt Greqisë. Në pranga ka rënë një 19-vjeçar nga Konispoli, ndërsa është shpallur në kërkim një 21-vjeçar nga Kosova.
Sipas policisë, dy të rinjtë bashkëpunonin për të transportuar kundrejt pagesës katër shtetas kinezë, të cilët synonin të kalonin ilegalisht në territorin grek. 19-vjeçari me iniciale M.M., kishte rolin e monitorimit të rrugës për praninë e policisë, ndërsa 21-vjeçari A.S., transportonte emigrantët me automjet.
Gjatë ndërhyrjes së policisë, në afërsi të Konispolit, 21-vjeçari braktisi automjetin dhe u largua me vrap, duke përfituar nga terreni dhe errësira. Policia bëri të mundur arrestimin e 19-vjeçarit, ndërsa sekuestroi dy automjetet e përdorura në këtë veprimtari.
Ndërkohë, vijon puna për kapjen e personit të shpallur në kërkim dhe dokumentimin e plotë të rastit. Materialet procedurale i janë referuar Prokurorisë së Sarandës për veprime të mëtejshme.
Lini një koment