Policia ka arrestuar 29-vjeçarin Myfit Qejvani, drejtuesin e automjetit tip “Benz” që shkaktoi aksidentin e rëndë rrugor me pasojë vdekjen e dy personave në fshatin e Borshit.
Nga hetimet ka rezultuar se ky shtetas, duke drejtuar automjetin e tij tej normave të lejuara të shpejtësisë, në rrugën e Plazhit, në Borsh, ka humbur kontrollin dhe është përplasur me një furgon në të cilin ndodhej një çift bashkëshortësh. Si pasojë e përplasjes, kanë humbur jetën në vendngjarje Kastriot Mehmeti, 66 vjeç, dhe bashkëshortja e tij Donika Mehmeti Proda, 70 vjeçe, të cilët po shpërndanin peshk në zonën e Borshit.
Nga aksidenti mbeti i plagosur edhe pasagjeri në automjetin e Qejvanit, Petrit Kapllanaj, i cili ka marrë dëmtime të lehta dhe ndodhet jashtë rrezikut për jetën. Ai dhe drejtuesi i mjetit janë transportuar në QSUT, ku po marrin trajtim mjekësor.
Qejvani u ndalua në flagrancë në spital dhe ndaj tij rëndon akuza për veprën penale “Shkelja e rregullave të qarkullimit rrugor”.
“Në vijim të veprimeve për dokumentimin e aksidentit të ndodhur më 30.05.2025, në rrugën e Plazhit, Borsh, ku humbën jetën dy shtetas dhe u plagosën dy të tjerë, u arrestua në flagrancë, për veprën penale ‘Shkelja e rregullave të qarkullimit rrugor’, drejtuesi i automjetit tip ‘Benz’, shtetasi M. Q., 29 vjeç, banues në Vlorë.
Nga veprimet hetimore ka rezultuar se ky shtetas, duke drejtuar automjetin tip ‘Benz’, ka humbur kontrollin mbi drejtimin e mjetit dhe është përplasur me një furgon, që drejtohej nga shtetasi K. M., 66 vjeç, i cili së bashku me pasagjeren D. P., 70 vjeçe, ka humbur jetën në vendngjarje”, njofton policia.
Lini një koment