Një ngjarje e rëndë ka tronditur mëngjesin e e kësaj të marte Ksamilin, ku një turist portugez rreth 20 vjeç humbi jetën pas një konflikti në ambientet e resortit “Principotes”. Viktima është identifikuar si Luis Miguel Varela Mendes, i cili kishte mbërritur në Ksamil së bashku me një grup turistësh portugezë.
Sipas të dhënave të reja të hetimit, konflikti dyshohet se ka ndodhur rreth orës 02:30, brenda ambienteve të lokalit “La Guerra”, pjesë e resortit “Principotes”. Pas përplasjes, 20-vjeçari dyshohet se është nxjerrë jashtë ambienteve të beach bar-it dhe është lënë në zonën e plazhit, ku është gjetur më vonë nga autoritetet.
Një nga elementët që po hetohet është fakti se trupi dyshohet se ka qëndruar për rreth tre orë në plazh, deri në momentin kur është zbuluar dhe policia ka mbërritur në vendngjarje.
Burimet bëjnë me dije se Luis Miguel Varela Mendes kishte marrë disa goditje me mjet prerës në shpinë dhe në kraharor, plagë që i kanë shkaktuar vdekjen. Ndryshe nga dyshimet fillestare, sipas të dhënave të reja të hetimit, përplasja dhe goditja fatale dyshohet se kanë ndodhur brenda ambienteve të “Principotes”.
Për ngjarjen është identifikuar si autor i dyshuar Sokrat Vata, 29 vjeç, banues në Has, i cili punonte si bodyguard në ambientet e lokalit. Dyshohet se konflikti ka nisur për motive të dobëta, ndërsa një nga pistat e hetimit lidhet me një vajzë.
Sipas burimeve, Vata ka një të kaluar kriminale në Angli, ku është dënuar për vepra që lidhen me posedimin e kokainës, armëve dhe drejtimin e automjeteve nën efektin e drogës.
Në kuadër të hetimeve, Policia e Sarandës ka shoqëruar rreth 42 persona, të cilët po merren në pyetje për të rindërtuar dinamikën e ngjarjes dhe për të përcaktuar përgjegjësinë e secilit prej personave që ndodheshin në lokal. Burimet bëjnë me dije se priten edhe arrestime të tjera.
Në hetim janë edhe dy shtetas turq, të cilët dyshohet se kanë ndihmuar autorin e dyshuar të largohej pas vrasjes. Ndërkohë, është ndaluar edhe Moisid Matushaj, 24 vjeç, banues në Gjirokastër, me detyrë Ndihmës Specialist i Hetimit të Krimit në Drejtorinë Vendore të Kufirit dhe Migracionit Gjirokastër.
Matushaj dyshohet se ka ndihmuar Sokrat Vatën pas ngjarjes. Sipas hetimeve, të dy punonin si bodyguard për kompaninë “Elite Security” në ambientet e “Principotes”. Hetuesit dyshojnë se Matushaj e ka ndihmuar Vatën të largohej nga vendi i ngjarjes.
Policia po heton gjithashtu rolin e çiftit turk që ndodhej në automjetin ku dyshohet se ishte fshehur Vata pas vrasjes. Sipas hetimeve, ekzistojnë dyshime se 29-vjeçari punonte gjithashtu si bodyguard për shtetasin turk.
Ndërkohë, është shpallur në kërkim edhe pronari i “Principotes”. Nga hetimet paraprake dyshohet se ai ka qenë në vendin e ngjarjes dhe më pas është larguar në drejtim të Tiranës, për t’iu shmangur hetimeve.
Grupi hetimor, nën drejtimin e Prokurorisë, po punon për të rindërtuar minutë pas minute dinamikën e ngjarjes, nga konflikti brenda lokalit, goditja me thikë dhe nxjerrja e trupit jashtë, deri te largimi i personave të dyshuar nga vendi i ngjarjes.
Hetimet vijojnë për dokumentimin e plotë të ngjarjes dhe përcaktimin e përgjegjësisë së secilit person të përfshirë. Priten zhvillime të reja dhe masa të tjera nga organet e drejtësisë në orët në vijim.
Lini një koment