Pronari i Orange Club, Spiro Iljadhi, ka reaguar publikisht në emisionin “STOP” në TV Klan, duke ngritur akuza të rënda për presion ndaj biznesit të tij dhe duke kërkuar që institucionet të hetojnë atë që ai e konsideron një fushatë të vazhdueshme kundër aktivitetit të tij.
Iljadhi pretendon se ndaj Orange Club janë ushtruar kontrolle të shpeshta, gjoba dhe provokime, ndërsa sipas tij, situata është përshkallëzuar pas refuzimit të kërkesave për para.
Në deklarimet e tij, ai përmend edhe Feliks Hodajn, shefin e Komisariatit të Policisë Sarandë, duke pretenduar se strukturat drejtuese të policisë janë të përfshira në presionin ndaj biznesit.
Akuzat bëhen edhe më të rënda kur Iljadhi pretendon se ka pasur tentativa për të krijuar situata artificiale brenda clubit, përfshirë futjen e lëndëve narkotike, në mënyrë që më pas përgjegjësia t’i faturohet subjektit.
“Ne kemi arsye të dyshojmë se po kërkohet të na provokojnë dhe të krijojnë situata artificiale brenda klubit. Nuk do të pranojmë që dikush të tentojë të fusë drogë në ambientet tona dhe më pas të përdorë Policinë për të na goditur”, shprehet pronari.
Iljadhi thekson se biznesi ka investuar në siguri dhe se çdo tentativë për të futur drogë apo për të krijuar incidente brenda ambienteve të Orange Club duhet të hetohet, pavarësisht se kush qëndron pas saj.
Denoncimi vjen pas incidentit të fundit në club, ku u raportua për një konflikt dhe dhunimin e shefit të krimeve të Sarandës, Mateo Bakalli. Ngjarja ka sjellë shoqërimin e disa personave dhe vijimin e hetimeve nga policia.
Në këtë situatë, Iljadhi kërkon që vëmendja të mos përqendrohet vetëm te biznesi dhe pronarët e tij, por edhe te mënyra se si veprojnë strukturat që kanë për detyrë zbatimin e ligjit.
Akuzat ndaj ndaj strukturave janë pretendime të bëra publikisht nga Spiro Iljadhi dhe mbeten për t’u verifikuar nga organet kompetente.
Lini një koment