Një aksident rrugor është regjistruar paraditen e kësaj të enjteje në aksin Tepelenë-Gjirokastër, në afërsi të kthesës së Kardhiqit, ku një ambulancë është përplasur me një automjet që po lëvizte në kah të kundërt.
Sipas informacioneve paraprake, ambulanca po transportonte një pacient nga Tepelena drejt spitalit rajonal të Gjirokastrës kur, për shkaqe ende të paqarta, është përplasur me një automjet të vogël. Si pasojë e përplasjes, janë lënduar pacienti që ndodhej në ambulancë si dhe dy pasagjerë nga mjeti tjetër.
Të tre të lënduarit janë dërguar menjëherë për ndihmë mjekësore dhe ndodhen jashtë rrezikut për jetën.
Policia rrugore ka mbërritur në vendngjarje dhe ka nisur hetimet për të përcaktuar shkaqet e aksidentit, ndërkohë që qarkullimi në zonë është normalizuar pas ndërhyrjes së shërbimeve të emergjencës.
Pamjet nga vendi i ngjarjes tregojnë për dëmtime të shumta të automjeteve të përfshira në aksident.
Lini një koment