Policia e Delvinës ka finalizuar me sukses operacionin e koduar “Ngarkesa”, duke çuar në arrestimin e një shtetasi që qarkullonte me armë zjarri dhe municion luftarak në automjetin e tij.
Në kuadër të kontrolleve intensive të ndërmarra për rritjen e sigurisë gjatë sezonit veror dhe parandalimin e ngjarjeve kriminale, shërbimet e Komisariatit të Policisë Delvinë, me mbështetjen e Drejtorisë Vendore të Policisë Vlorë dhe Drejtorisë së Përgjithshme të Policisë së Shtetit, ndaluan në vendin e quajtur “Blerimas” një automjet tip “Toyota”.
Gjatë kontrollit të ushtruar në bagazhin e automjetit, u gjetën dhe sekuestruan një armë zjarri kallashnikov dhe një krehër me 30 fishekë. Në vijim të veprimeve procedurale, në pranga u vu drejtuesi i mjetit, shtetasi Eqerem Sora, 44 vjeç, banues në Vlorë. 44-vjeçari rezulton i dënuar në SHBA për përdhunimin e një shtetaseje.
Ai akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme ligjore.
Kontrolle intensive nga policia u zhvilluan dhe në qytetin e Sarandës.
Lini një koment