Ish-kryetari i Bashkisë së Korçës, Robert Kotmilo, është ndarë nga jeta këtë 2 prill, në moshën 83-vjeçare, pas një periudhe të gjatë problemesh shëndetësore. Kotmilo shërbeu si kryebashkiak i Korçës në vitet e vështira 1996-2000, përfshirë periudhën e trazuar të vitit 1997.
Madje kur Partia Demokratike i ofroi një mandat të dytë për të kandiduar, ai nuk pranoi.
Kotmilo u nda nga jeta i vetëm në banesën e tij, duke jetuar në kushte të vështira ekonomike. Në vitet e fundit, për të u kujdesën organizata humanitare dhe veçanërisht Mitropolia e Korçës.
Kotmilo është ndër të paktët zyrtarë të lartë të këtij vendi, i cili nuk e përdori detyrën për përfitime personale.
Në rrëfimin e tij të fundit për media ai foli për karrierën e tij të pasur, e cila, megjithatë, nuk i la asgjë pas.
“Unë punova 29 vite si kryeinxhinier i ndërmarrjes së frigoriferëve në Korçë, bëra shumë për qytetin dhe vendin. Më pas, isha kryetar i Këshillit të Bashkisë dhe për katër vjet kryebashkiak,” deklaronte ai në intervistën e dhënë më 19 tetor 2024.
Gjithashtu shprehu keqardhje për korrupsionin në nivele të larta në institucionet shqiptare.
“Më vjen keq kur dëgjoj se gjashtë kryetarë bashkie dhe katër ministra janë në burg. Është e rëndë që persona të tillë, të cilët përfundojnë pas hekurave, të kenë qenë në krye të bashkive apo institucioneve drejtuese të vendit. Shumë e rëndë,” tha ai.
Lini një koment