Bota e artit shqiptar ka humbur një nga figurat e saj më të mëdha. Aktorja e njohur Margarita Xhepa ka ndërruar jetë në moshën 93-vjeçare. Lajmin e hidhur e ka konfirmuar djali i saj, aktori Ndriçim Xhepa.
Sipas burimeve familjare, artistja ka vuajtur prej kohësh nga probleme shëndetësore, ndërsa së fundmi gjendja e saj ishte rënduar për shkak të komplikacioneve me mushkëritë. Ajo u shua në një spital privat, vetëm një ditë pasi kishte festuar 93-vjetorin e lindjes.
Margarita Xhepa ishte një ikonë e kinematografisë dhe teatrit shqiptar, me një karrierë të pasur që numëron mbi 150 role në skenën teatrore dhe 32 role në kinematografi. Interpretimet e saj mbeten të paharrueshme, duke e kthyer atë në një nga figurat më të dashura të artit shqiptar.
Për kontributin e saj të jashtëzakonshëm në kulturën kombëtare, Xhepa është nderuar me disa nga titujt më të lartë shtetërorë, përfshirë “Artiste e Popullit” dhe “Nderi i Kombit”. Ajo ka marrë vlerësime të shumta për interpretimet e saj brilante, si në dramaturgjinë shqiptare, ashtu edhe në veprat klasike botërore.
Në vitin 2007, ajo u vlerësua me “Çmimin e Karrierës” për rolin e Nadjezhnës në monodramën “Kënga e mjellmës” të Çehovit, duke lënë një gjurmë të pashlyeshme në historinë e skenës shqiptare.
Me ndarjen e saj nga jeta, arti shqiptar humbi një prej personaliteteve më të spikatura, por trashëgimia që Margarita Xhepa la pas do të mbetet e pavdekshme për brezat që vijnë
Lini një koment