Partia Demokratike ka denoncuar këtë të enjte Partinë Socialiste për shkelje të Kodit Zgjedhor në qytetin e Delvinës. Sipas selisë blu, PS ka hapur një zyrë elektorale vetëm 50 metra larg Komisionit të Zonës së Administrimit Zgjedhor (KZAZ), ndonëse ligji përcakton një distancë minimale prej 300 metrash.
Denoncimi fillimisht u bë nga kandidatja e PD-së në qarkun e Vlorës, Ina Zhupa, ndërkohë që më vonë Koalicioni “PD-Shqipëria për Aleancën Madhështore” depozitoi në KQZ një kërkesë zyrtare për mbylljen e kësaj zyre elektorale.
“Kjo kërkesë lidhet me konstatimin e një shkeljeje të rregullave të përcaktuara në legjislacionin zgjedhor nga Partia Socialiste. Konkretisht, në qytetin e Delvinës është hapur një zyrë zgjedhore e PS-së në një distancë të afërt me KZAZ-në e Delvinës, e cila ndodhet te kinoteatri i qytetit, aty ku janë parashikuar edhe qendrat e votimit për zgjedhjet e 11 majit.
Sipas informacioneve nga terreni, kjo zyrë përdoret nga kandidatët e listës shumëemërore të PS-së, Ardit Bido dhe Ina Malko. Bashkëngjitur janë edhe pamjet e denoncimit në fjalë.
Hapja e një zyre zgjedhore në një distancë më të vogël se 300 metra nga qendrat e votimit apo KZAZ ndalohet nga ligji, për të shmangur çdo ndikim te zgjedhësit. Në këto kushte, ne si subjekt zgjedhor, Koalicioni Partia Demokratike-Aleanca për Shqipërinë Madhështore, i drejtohemi KQZ-së që të konstatojë këtë shkelje dhe të marrë masat e duhura administrative dhe ligjore për mbylljen e menjëhershme të kësaj zyre,” thuhet në kërkesë.
Lini një koment