Prokuroria e Posaçme Kundër Korrupsionit dhe Krimit të Organizuara (SPAK) ka dhënë një reagim zyrtar lidhur me sulmin kibernetik që ndodhi më 12 mars, ku u përpoq të hakeroheshin disa e-maile të prokurorëve të këtij institucioni. Sipas SPAK, ndërhyrja rezultoi në marrjen e disa informacioneve nga e-mailet, por sistemi i brendshëm IT i SPAK nuk ka pësuar dëme.
SPAK thekson se janë ndërmarrë masa urgjente për identifikimin e autorëve të hakerimit. Dy persona, Arnold Rrokaj dhe Zambak Gjoni, janë arrestuar. Rrokaj dyshohet se ka kryer ndërhyrjen në e-maile, ndërsa Gjoni akuzohet për shpërndarjen e informacionit të vjedhur. SPAK gjithashtu ka konfirmuar se pati një tentativë për të hakeruar e-mailin e drejtuesit të SPAK, Altin Dumani, por kjo tentativë ka dështuar.
Në lidhje me hetimet, SPAK ka njoftuar se ka nisur një hetim të brendshëm administrativ për të verifikuar sigurinë e sistemit IT të institucionit dhe ka siguruar që sistemi i përgjithshëm IT nuk është cenuar. Po ashtu, janë marrë masa shtesë për forcimin e protokolleve mbrojtëse të këtij sistemi.
“Derisa hetimi të përfundojë, nuk ka asnjë informacion që sugjeron se personat e arrestuar kanë bashkëpunuar me ndonjë personel të brendshëm të SPAK,” theksoi SPAK.
Në hetimet që janë duke u zhvilluar, SPAK dyshon se të arrestuarit, Zambak Gjoni dhe Arnold Rrokaj, janë pjesë e një grupi të strukturuar kriminal që ka kryer ndërhyrje të paautorizuar kompjuterike. Gjoni ka qenë drejtor në paraburgimin e Vlorës, ndërsa Rrokaj ka qenë zyrtar në IMT Vlorë. Gjatë hetimeve, janë marrë në pyetje disa persona dhe dyshohet se informacionet që janë marrë nga e-mailet e prokurorëve janë shpërndarë nëpërmjet telefonave celularë.
SPAK ka sekuestruar gjithashtu pajisje që dyshohet të jenë përdorur për realizimin e ndërhyrjeve dhe materialet e shkarkuara nga e-mailet e prokurorëve. Sipas burimeve, grupi ka shfrytëzuar fjalëkalimet jo të sigurta të e-maileve të prokurorëve Behar Dibra, Enkeleda Millonai dhe Elida Kaçkini.
Lini një koment