Rebeka Gannon, një 29-vjeçare britanike e apasionuar pas zhytjes dhe eksplorimit të botës nënujore, gjeti vdekjen tragjikisht më 19 shtator 2022 në ujërat e Sarandës. Ajo kishte ardhur në Shqipëri për të shijuar bukuritë e bregdetit dhe për të eksploruar rrënojat e një anijeje të mbytur, por zhytja e saj e fundit rezultoi fatale.
Në atë mëngjes të trishtë, Rebeka dhe miqtë e saj, të shoqëruar nga guida shqiptare e qendrës së zhytjes “Spiranca Diving Center”, u nisën për një eksplorim nënujore. Por diçka shkoi keq. Ajo u kthye në sipërfaqe pa shenja jete, ndërsa përgjegjësia për ngjarjen mbeti në hije.
Shkeljet dhe mungesa e sigurisë
Hetimet zbuluan se shkaku kryesor i vdekjes dyshohet të ketë qenë një defekt në jelekun e ajrit që duhej të ndihmonte zhytësen të rikthehej në sipërfaqe. Sipas dosjes hetimore, njëra nga instruktorët, e identifikuar si G.B., kishte vënë re një problem me pajisjet e Rebekës para zhytjes, por pas një prove të shpejtë, i kishte dhënë dritën jeshile për të vazhduar.
Dëshmitarët raportuan gjithashtu një mungesë të qartë profesionalizmi nga ana e ekipit shqiptar të instruktorëve. Për më tepër, një nga instruktorët që ishte përgjegjës për pajisjet, nuk kishte kualifikimet e duhura për të kryer këtë detyrë.
Në dosjen hetimore përmendet gjithashtu se gjatë kontrollit të skafit që transportoi grupin, u gjetën pajisje zhytjeje dhe bombola oksigjeni, por nuk u sqarua nëse ato ishin në përputhje me standardet e sigurisë.
Një drejtësi e munguar dhe një fajtor i lirë
Në qendër të akuzave qëndron Saimir Kushova, një ish-punonjës policie dhe administratori i “Spiranca Diving Center”, i cili u shpall përgjegjës për humbjen e jetës së Rebekës. Pavarësisht nisjes së hetimeve në Shqipëri, ai arriti të shmangë gjykimin duke paguar një garanci pasurore dhe më pas u largua nga vendi, duke u zhvendosur në Norvegji. Më vonë, ai u përfshi në një rrjet ndërkombëtar të trafikut të drogës.
Tre vite pas ngjarjes, drejtësia për vdekjen e Rebekës Gannon ende nuk është vendosur. Dosja e saj mbetet e pazgjidhur në sistemin gjyqësor shqiptar, ndërsa familja e saj vazhdon të kërkojë përgjigje dhe drejtësi.
Kjo ngjarje tronditëse ngre pikëpyetje serioze mbi standardet e sigurisë në turizmin shqiptar dhe mbi mënyrën se si funksionojnë institucionet ligjzbatuese në raste të tilla. Për turistët që zgjedhin Shqipërinë si destinacion, ajo mbetet një histori paralajmëruese për mungesën e rregullave dhe përgjegjësisë.
Lini një koment