Policia e Sarandës ka identifikuar dhe shpallur në kërkim shtetasin M. B., 21 vjeç, si autorin e ngjarjes së rëndë të ndodhur mbrëmjen e së shtunës në lagjen nr. 3 të qytetit. I riu dyshohet se ka kanosur me thikë kandidaten e Partisë Demokratike për deputete në zgjedhjet e 11 majit, Matilda Qurku, bashkëshortin e saj Elidon Bajrami dhe fëmijët e tyre të mitur.
Sipas njoftimit zyrtar, pas konfliktit verbal, M. B. ka ndjekur automjetin me të cilin udhëtonte familja Qurku-Bajrami dhe e ka goditur disa herë, duke i shkaktuar dëme materiale dhe duke rrezikuar seriozisht sigurinë e tyre. Ngjarja ka ndodhur pranë lokalit në pronësi të familjes, ndërsa pamjet filmike janë bërë publike në rrjetet sociale.
Policia ka sekuestruar automjetin e autorit, ndërkohë që vijon puna për lokalizimin dhe arrestimin e tij. Ndaj 21-vjeçarit rëndojnë akuzat për “Kanosje”, “Shkatërrim prone” dhe “Mbajtje pa leje e armëve të ftohta”.
Materialet hetimore i janë referuar Prokurorisë së Sarandës për veprime të mëtejshme procedurale.
Lini një koment