Qëlloi gruan me thikë, arrestohet nga policia Adriatik Bodini

Policia e Sarandës ka vënë në pranga Adriatik Bodinin, 55 vjeçarin i cili dyshohet se pasditen e së hënës qëlloi me thikë bashkëshorten e tij, Mirjana Bodini, 51 vjeçe.

Ngjarja ndodhi në ambientet e banesës së çiftit, në një pallat në lagjen nr.4, duke tronditur komunitetin lokal.

E plagosura mori ndihmën e parë në spitalin e Sarandës dhe më pas u dërgua me urgjencë në spitalin e Vlorës, ku ndodhet në reanimacion. Mjekët raportojnë se gjendja e saj mbetet e rënduar.

Burime bëjnë me dije se 55-vjeçari njihet për konsum të tepruar të alkoolit. Çifti, që është me origjinë nga Nivica, ka një djalë. Ndërkohë, fqinjët janë shprehur të shokuar nga ngjarja, duke i përshkruar si një familje e qetë.

Megjithatë ata jashtë kamerave shprehen se viktima shpesh ishte përfshirë në konflikte me banorët, veçanërisht me fëmijët e lagjes.

Hetimet janë në vijim për të zbuluar rrethanat dhe motivet e sulmit, ndërsa Bodini pritet të dalë përpara gjykatës për masën e sigurisë.