Një qytetare nga Tirana, me inicialet B.L., ka denoncuar në emisionin investigativ “Stop” një rast të zaptimit të pronës së saj në Ksamil, nga shtetasi Agron Lile. Sipas denoncimit, pronësia mbi një objekt 25 m² dhe një truall prej 33 m² u fitua ligjërisht përmes një ankandi bankar në vitin 2021, pasi prona ishte lënë kolateral nga Lile dhe ai nuk kishte përmbushur detyrimet ndaj bankës.
Pavarësisht certifikatës zyrtare të pronësisë që disponon, zonja B.L. nuk ka mundur asnjëherë të gëzojë pronën. Ajo deklaron se ish-pronari ka ndërruar bravat, ka hyrë me forcë në ambient dhe e ka zaptuar shtëpinë, duke futur madje edhe persona të tjerë me qira.
“Për familjen time kjo pronë ka vlerë të madhe emocionale. Është një dhuratë nga im atë, që jeton prej vitesh në emigracion. Ai më ka thënë shpesh: ‘Nuk të kam blerë një pronë, por një hall.’”, shprehet ajo.
Sipas saj, Agron Lile jo vetëm që nuk ka pranuar humbjen ligjore të pronësisë, por ka ndërmarrë edhe veprime të tjera paligjshme, si falsifikim dokumentesh dhe mosdeklarim të të ardhurave nga qiratë.
Siaps emisionit investigativ ai ka ndërtuar pa leje në pronë dhe ka tentuar t’ia shesë zonjës B.L. shtesat pa titull pronësie për 30 mijë euro.
Shtetasja B.L., shton se iu drejtua Prokurorisë së Sarandës për problemin e saj, por prokuroria Valbona Maja, vendosi mosfillimin e hetimeve.
“Kam pritur me durim, kam ndjekur çdo rrugë ligjore. Kur pashë se edhe Prokuroria nuk merrte masa, atëherë iu drejtova emisionit ‘Stop’, si një shpresë e fundit”, shprehet denoncuesja.
Ndërkohë, edhe Inspektorati i Mbrojtjes së Territorit në Sarandë ka konstatuar ndërtim pa leje në objekt, por nuk ka marrë masa, duke u justifikuar me vendimin e prokurores për mosfillimin e hetimeve.
Lini një koment