Policia Kufitare e Vlorës, në bashkëpunim me Rojet Bregdetare, ndërmori një operacion shpëtimi për t’iu ardhur në ndihmë disa shtetasve të huaj, të cilët rrezikuan të mbyteshin në det pasi veliera e tyre pësoi defekt gjatë lundrimit në afërsi të ishullit të Sazanit.
Sipas njoftimit të bërë nga Policia Kufitare e Vlorës, Qendra Ndërlidhëse për Operacionet Detare informoi autoritetet lokale për një mjet lundrues tip velierë, me flamur të huaj, i cili ndodhej në rrezik. Veliera kishte nisur udhëtimin nga Italia me destinacion Kroacinë, por kishte pësuar një defekt në motor. Si pasojë e dallgëve të fuqishme dhe afërsisë me bregun, veliera ishte në rrezik të përmbysej dhe përplasjeje me shkëmbinjtë.
Menjëherë pas marrjes së informacionit, Policia Kufitare e Vlorës, në bashkëpunim me Rojet Bregdetare, ndërhynë me shpejtësi dhe arritën të shpëtonin shtetasit që ndodheshin në bord. Po ashtu, veliera u tërhoq në Triport, në qytetin e Vlorës.
Gjatë inspektimit të bërë, të gjithë personat në bord u gjetën në gjendje të mirë shëndetësore dhe u transportuan në breg.
Lini një koment