I mori para 58-vjeçares me premtimin se do t’i kryente punime në banesë, “e pëson” i riu në Sarandë

Një 32-vjeçar nga Delvina është proceduar penalisht nga Policia e Sarandës, pas një kallëzimi të bërë nga një shtetase 58-vjeçare nga Fieri, e cila pretendon se është mashtruar nga i riu.

Sipas kallëzimit të gruas, i riu i ka premtuar kryerjen e disa punimeve në banesën e saj, por pas marrjes së parave nuk ka kryer asnjë nga detyrimet e marra përsipër.

Ngjarja është referuar tashmë në Prokurori për hetime të mëtejshme.

Në njoftimin zyrtar të Policisë thuhet:

“Specialistët për Hetimin e Krimeve në Komisariatin e Policisë Sarandë referuan materialet në Prokurori dhe nisën procedim penal për shtetasin H. R., 32 vjeç, banues në Delvinë, pasi shtetasja R. K., 58 vjeçe, banuese në Fier, ka kallëzuar se është mashtruar prej tij, duke i dhënë një shumë parash për punime që nuk janë realizuar.”

Autoritetet po vijojnë veprimet hetimore për dokumentimin e plotë të ngjarjes dhe ndjekjen ligjore të rastit.