Në këto ditë të nxehta vere, me temperatura që arrijnë deri në 35 Gradë Celcius, disa lagje të Sarandës po përballen me mungesë totale të furnizimit me ujë të pijshëm. Situata vjen në kulmin e sezonit turistik, kur qyteti është i tejmbushur me vizitorë.
Prej gati 5 ditësh, banorët e lagjes nr. 3 (rruga “Gjergj Arianiti”), lagjes nr. 4 në Kodër, rrugës së Bashkisë dhe rrugës së 5-të raportojnë se janë pa ujë. Ankesa të shumta kanë mbërritur pranë redaksisë së Saranda Online, ku qytetarët kërkojnë ndërhyrje urgjente nga ndërmarrja e ujësjellësit të qytetit.
Mungesa e ujit po ndikon rëndë jo vetëm në jetën e përditshme të banorëve, por edhe në imazhin turistik të Sarandës. Turistët po përballen me një realitet që e largon Shqipërinë nga aspirata për një turizëm cilësor.
Sipas banorëve dhe burimeve lokale, përgjegjësia për këtë situatë i atribuohet drejtorit të ujësjellësit, Amardo Goxharaj, si dhe përgjegjësit për zonën e Sarandës, Alban Alikaj. Pretendimet e ngritura nga qytetarët dhe burime të tjera flasin për favorizim të furnizimit me ujë ndaj disa hoteleve, në këmbim të pagesave të paligjshme, duke lënë pa furnizim një pjesë të madhe të qytetit.
Autoritetet lokale ende nuk kanë dhënë një reagim zyrtar mbi këtë çështje, ndërkohë që autoritetet ligjzbatuese duhet të nisin hetimet.
Lini një koment