Me armët gati për të kryer vrasje, kush janë të rinjtë që kishin ngritur pritën në Gjashtë

Pesë persona janë arrestuar në Sarandë, pasi dyshohet se kishin ardhur në qytet me qëllim kryerjen e një vrasjeje në fshatin Gjashtë.

Sidorel Moriseni, 32 vjeç, banues në Tiranë, dhe Alfred Kaja, 26 vjeç, banues në Kavajë, u kapën pranë një lokali në Gjashtë, teksa ndodheshin në një rrugicë pa ndriçim të mjaftueshëm, ku kishin ngritur një pritë.

Sipas policisë, ata mbanin në duar dy pistoleta, njëra prej të cilave me silenciator dhe ishin në pritje të objektivit të tyre.

Në pranga përfunduan edhe Vitrin Hoxha, 20 vjeç, banues në Kavajë, Vonis Poka, 31 vjeç, banues në Tiranë, dhe Franko Bobja, 21 vjeç, banues në Kavajë, të dyshuar për veprën penale “Moskallëzimi i krimit”.

Policia sekuestroi dy armë zjarri pistoleta, municion luftarak, një silenciator dhe dy automjete, ndërsa hetimet vijojnë për zbardhjen e plotë të rrethanave dhe identifikimin e objektivit të dyshuar.