Kanë hyrë në fuqi ndryshimet në Kodin Rrugor, të cilat parashikojnë masa më të ashpra për drejtuesit e mjeteve që shkelin rregullat e qarkullimit, me synim rritjen e sigurisë në rrugë.
Një nga ndryshimet kryesore lidhet me drejtimin e automjetit nën efektin e alkoolit. Drejtuesit që kapen për herë të dytë me mbi 0.5 gram alkool për litër gjak, pasi janë ndëshkuar më parë për të njëjtën shkelje, do ta humbasin përgjithmonë lejen e drejtimit.
Rregulla të reja janë vendosur edhe për shoferët e rinj. Personat që kapen duke drejtuar mjet pa patentë nuk do të lejohen të regjistrohen në autoshkollë për një vit, ndërsa të miturit do të duhet të presin dy vite pas mbushjes së moshës 18 vjeç për të aplikuar për leje drejtimi.
Për dy vitet e para pas pajisjes me patentë, shoferët e rinj nuk do të lejohen të konsumojnë alkool para drejtimit të mjetit. Gjithashtu, ata nuk do të mund të qarkullojnë me më shumë se 90 km/h në autostradë dhe 80 km/h jashtë zonave të banuara. Shkelja e këtyre rregullave ndëshkohet me gjobë, pezullim të patentës dhe heqje pikësh.
Kodi i ri parashikon gjithashtu gjoba më të larta për tejkalimin e shpejtësisë dhe manovrat e rrezikshme. Drejtuesit që kapen dy herë brenda një viti duke përdorur celularin gjatë drejtimit do t’u pezullohet patenta për tre muaj. Ndalimi i përdorimit të celularit zbatohet edhe për drejtuesit e biçikletave, motorëve deri në 50 cc dhe monopatinave.
Një tjetër ndryshim është se pezullimi i patentës nuk mund të shmanget më duke paguar dyfishin e gjobës. Për lejet e drejtimit të lëshuara nga autoritetet shqiptare, pezullimi do të zbatohet automatikisht./M.Q
Lini një koment