Pas skandalit me 8 ton fileto pule të kontaminuara me salmonelë të importuara nga Brazili, një tjetër alarm për sigurinë ushqimore është ngritur në Shqipëri. Këtë herë, tre ngarkesa me luleshtrydhe të ardhura nga Greqia kanë rezultuar të kontaminuara me pesticide të rrezikshme për shëndetin, sipas sistemit të alarmit të shpejtë për ushqimin të Komisionit Europian (RASFF).
Ngarkesa e parë, e cila ka hyrë në vend më 1 prill, ka rezultuar me mbetje Clofentezine, një pesticid që përdoret për luftimin e merimangave, por që është ndaluar në disa vende për shkak të toksicitetit të tij të lartë.
Ngarkesa e dytë, e importuar më 17 mars, përmbante mbetje të tre substancave të tjera: Cyprodinil, Avermectin Bla dhe Fludioxonil, pesticide me rrezik të lartë për shëndetin nëse konsumohen në sasi të mëdha.
Rasti i tretë është konstatuar më 5 mars, kur analizat kanë zbuluar praninë e Hexythiazox-ës, një pesticid tjetër i rrezikshëm që mund të ndikojë negativisht në sistemin nervor dhe atë endokrin.
Autoritetet shqiptare nuk kanë bërë ende të ditur sasinë e përgjithshme të produktit të importuar dhe nëse ky është shpërndarë për konsum. Sidoqoftë, deklarojnë se operatori i biznesit ushqimor ka njoftuar subjektet tregtare për kthimin e produktit në rast se ndodhet ende në stok.
Lini një koment